Samarbeid med delstaten Thüringen i Tyskland

I saksframlegget til fylkesutvalget blir det lagt vekt på at Oppland bør samarbeide med regionar i land som er viktige samarbeidspartnarar for Norge, og det blir vist til bl.a. regjeringa sin Tysklandsstrategi. Det er også viktig for Oppland fylkeskommune å støtte opp under allereie eksisterande samarbeidsrelasjonar.  Det er fleire aktørar i Oppland som har samarbeidspartnarar i Thüringen (Lillehammer kommune, høgskulane, Vargstad vidaregåande, ungdomsskulane i Lillehammer). Vidare er det mange fellestrekk mellom Oppland og Thüringen og mange aktulle område for samarbeid: vidaregåande opplæring, grunnopplæring, internasjonalt servicekontor, høgare utdanning, reiseliv, kultur, kulturvern, vintersportsregionprosjektet, mm.

Ein samarbeidsavtale Oppland-Thüringen kan vere ei ramme for samarbeid på mange felt. Innan skule/utdanning er det allereie ein del aktivitet. Denne kan utvidast til fleire skular i Oppland og Thüringen. Skulesamarbeidet kan også involvere fagavdelinga i OFK, f.eks. ved at det blir inngått eit Comenius Regio-partnarskap. For internasjonalt servicekontor er det interessant å få avtalar med fleire bedrifter for utplassering av lærlingar. Det kan jobbast med prosjekt i Aktiv Ungdomprogrammet, inkl. utsending og mottak av volontørar. Høgskulane sitt samarbeid med Fachhochschule Schmalkalden kan bli meir omfattande og i større grad koblast opp mot dei andre samarbeidstiltaka.

Det er ei målsetting for skulane å auke interessa for framandspråk. I eit samarbeid mellom Oppland og Thüringen kan språksatsing vere eit gjennomgåande tema. Mange industribedrifter i Oppland jobbar mot Tyskland og opplever behov for kompetanse i tysk språk. Det same gjeld reiselivsnæringa.

For vintersportsregionprosjektet vil det vere nyttig å utveksle erfaringar og kompetanse med Oberhof. Utveksling av frivillige er ein mulig aktivitet.

Samarbeid mellom kulturinstitusjonar og utveksling av kunstnarar er eit anna aktuelt område. Det er mange finansieringsordningar som kan brukast, bl.a. Ruhrgas-stipend og Willy Brandtstiftelsen.

Det kan også vere aktuelt å utvikle samarbeid innan bruk/vern, nasjonalparkar, kulturarv, industri/næringsliv mm.

Les mer om Thüringen